पर्वत ।
जिल्ला प्रहरी कार्यालय, पर्वतको आयोजना, जिल्ला प्रशासन कार्यालय, पर्वतको सहजीकरण र पैयू गाउँपालिका, पर्वतको सहकार्यमा पैंयू गाउँपालिका वडा नं. ७ को सभाहलमा नागरिक सुनुवाई कार्यक्रम सम्पन्न भएको छ ।
प्रमुख जिल्ला अधिकारी हरि प्रसाद घिमिरेको अध्यक्षता तथा प्रमुख अतिथि पैंयू गाउँपालिकाका अध्यक्ष तोरण मल्ल ठाकुरी रहनु भएको उक्त कार्यक्रममा विशिष्ट अतिथिहरू सशस्त्र प्रहरी बल २५ नं गण हेडक्वाटर चण्डिका गणका प्रमुख सशस्त्र प्रहरी उपरीक्षक करण सिंह धामी, जिल्ला प्रहरी कार्यालय पर्वतका कार्यालय प्रमुख प्रहरी नायव उपरीक्षक विजय यादव, इलाका प्रहरी कार्यालय हुवास, पर्वतका कार्यालय प्रमुख प्रहरी निरीक्षक सुदिप भन्डारी, इलाका प्रशासन कार्यालय हुवास, पर्वतका प्रमुख अनिल राज कोईराल, पैंयू गाउँपालिकाका वडा अध्यक्षहरु, विभिन्न राजनितिक दलका प्रतिनिधी, पत्रकार, पूर्व प्रहरी कर्मचारी टोल सुधार समिति, स्थानिय जनप्रतिनिधि, स्थानीय संघसंस्था र स्थानीय बासिन्दाहरुको सहभागितामा रहेको थियो ।
समुदायको शान्ति सुरक्षा, अपराध नियन्त्रण, सेवा प्रवाह सम्बन्धमा सहजीकरण र समन्वयलाई मध्यनजर गर्दै सम्पन्न भएको उक्त नागरिक सुनुवाई कार्यक्रममा उपस्थित व्यक्तिहरुले अवरुद्ध सडक, नदिजन्य उत्खनन्, मादक पदार्थ सेवन, स्थानीय तहबाट प्राप्त हुने अनुदान, सेवा सुविधा, विद्यालयको अनुगमन अधिकार दुरुपयोगका साथै समसामयिक समस्याहरु सम्बन्धी गुनासोहरु राखेका थिए ।
सर्वसाधारणहरुले राखेका जिज्ञासाहरुलाई जिल्ला प्रहरी कार्यालय पर्वतका कार्यालय प्रमुख प्रहरी नायव उपरीक्षक विजय यादव र प्रमुख जिल्ला अधिकारी हरि प्रसाद घिमिरेले सम्बोधन गर्नुभएको थियो ।
