पर्वत।
जलजला गाउँपालिकाले आयोजना गर्न लागेको विद्यालय स्तरीय खेलकुद प्रतियोगिताको तयारी पुरा भएको छ। आउँदो मंसिर १०,११ र१२ गते जलजला–३ मल्लाजस्थित विद्या ज्योति माध्यमिक विद्यालयमा हुने खेलकुद कार्यक्रमका लागि शुक्रबार एक विशेष तयारी बैठक सम्पन्न गरिएको छ। उक्त बैठकको अध्यक्षता गाउँपालिका उपाध्यक्ष दीपक आचार्यले गर्नु भएको थियो। बैठकमा वडा अध्यक्षहरू, कार्यपालिका सदस्यहरू, विभिन्न विद्यालयका खेलकुद शिक्षक तथा प्रतिनिधि, खेलकुद व्यवस्थापनका अफिसियलहरू, साथै मल्लाज क्षेत्रमा क्रियाशील क्लबका सदस्यहरूको उल्लेख्य सहभागिता रहेको थियो।
यस वर्षको विद्यालयस्तरीय खेलकुदमा १४ वटा विद्यालय सहभागी रहने छन्। प्रतियोगितामा १५ विधाका ३० भन्दा बढी खेलका करिब १५० बढी पदकहरुमा ( स्वर्ण, रजत र कास्य) छात्र–छात्राबीच प्रतिस्पर्धा हुने जलजला गाउँपालिकाको शिक्षा तथा खेलकुद शाखाको सहायक शिक्षा अधिकृत देवी रिजालले जानकारी दिनुभयो।
बैठकले मैदान, टिम दर्ता, खेल तालिका, निर्णायक व्यवस्थापन, स्वास्थ्य सुरक्षादेखि समग्र कार्यक्रमको सञ्चालनसम्बन्धी आवश्यक तयारीहरू सम्पन्न गर्नेछ। गाउँपालिकाले विद्यालय स्तरमा गर्ने यस्ता खेलकुद कार्यक्रमले विद्यार्थीको क्षमता विकास, अनुशासन, नेतृत्व क्षमता तथा स्वास्थ्यप्रति सचेतना बढाउने माध्यमका रूपमा विकास हुने विश्वास लिएको छ। उक्त कार्यक्रम भोलि मंसिर १० गते विधिवत रुपमा उद्घाटनसँगै तीन दिन सञ्चालन हुनेछ।