पर्वत ।
कम्युनिष्टको बलियो किल्लाको रूपमा गनिदै आएको जिल्लाको मोदी गाउँपालिका वडा न ५ बाजुङमा यस पटक नेपाली कांग्रेसले बिजय हासिल गरेको छ । गठबन्धनको तर्फबाट नेपाली कांग्रेसका वडा अध्यक्ष मानबहादुर अधिकारी झिनो मतका साथ विजयी भएका हु्न् ।
यो सँगै गठबन्धनले मोदीको दुई वडाध्यक्ष हात पारेको छ । यस अघि वडा नं ४ मा पनि कांग्रेसका मोहन चोचाँगी पुन वडाध्यक्ष बिजयी भै सकेका छन् ।
विगतका संसदीय एबम् स्थानीय चुनावहरुमा नेकपा एमालेले भारी मतान्तरले जित्ने गरेको भए पनि यस पटक भने नेकपा एमालेका गाउँ पालिका पार्टी अध्यक्ष समेत रहेका प्रतिस्पर्धी उम्मेदवार तेज बहादुर क्षेत्रीलाई २ मतले हराउँदै अधिकारीले वडाअध्यक्ष जितेका छन् ।
एमालेका तेज बहादुर क्षेत्रीले कुल १११२ मत ल्याउँदा कांग्रेसका अधिकारीले १११४ मत ल्याएका छन् । अन्य ४ जना वडा सदस्य भने नेकपा एमालेले नै जितेको छ ।
लामो समय सम्म तत्कालीन गाविस सचिवको रूपमा काम गरेका अधिकारी लोकप्रिय नेताका रूपमा चिनिन्छन् । २०७४ काे स्थानीय निर्वाचनमा अधिकारी वडाध्यक्षको उम्मेदवारमा एमालेका दल बहादुर मल्लबाट पराजित भएका थिए ।