पर्वत ।
जिल्लाको मोदी गाँउपालिकामा दुई दिने नि:शुल्क मुटु परीक्षण स्वास्थ्य शिविर सम्पन्न भएको छ। मोदी गाँउपालिका र सेभ द हार्टको आयोजनामा पौष १२ र १३ गते सम्पन्न भएको शिविरमा बाह्र सय जनाको मुटु परीक्षण भएको जनाइएको छ। सेवा लिने मध्ये ५९५ जनाको मुटुको इसिजी र ३४७ जनाको ईको गरिएको थियो ।
शिविरमा ७ लाख बराबरको औषधि वितरण सहित सेभ द हर्टको तर्फबाट कुल २९ लाख ८३ हजार ४ सय ५० रुपैयाँ बराबरको सहयोग प्राप्त भएको थियो । शिविरको लागि वरिष्ठ मुटु रोग विशेषज्ञ एवम् त्रि.वि. मनमोहन कार्डियो थोरासिक भास्कुलर एण्ड ट्रान्सप्लान्ट सेन्टरको कार्डियो थोरासिक भास्कुलर सर्जरीका विभागीय प्रमुख वरिष्ठ मुटु रोग विशेषज्ञ डा.अनिल भट्टराईको नेतृत्वमा चिकित्सक र अन्य स्वास्थ्यकर्मीसहित २३ जना सहभागी थिए।
स्वास्थ्य परीक्षण गरिएकामध्ये ५ जनाको विभिन्न खालको अपरेसन गर्नुपर्ने र त्यसको जिम्मेवारी आफूहरूले लिएको डा.अनिल भट्टराईले बताउनुभयो। शिविरमा इसिजि, इको सहितका सेवा उपलब्ध गराइएको सेभ द हार्टका महासचिव शेरबहादुर रानाले जानकारी दिनुभयो। रानाका अनुसार सेभ द हर्ट द्वारा संचालित गरिएको यो शिविर १ सय ३१ औं शिविर हो ।