मोदी, पर्वत।
जिल्लाको मोदी गाउँपालिका वडा नं २, देउपुर, टापुमा रहेको आदर्श आधारभूत विद्यालयमा बिहीबार राति अज्ञात समूहले तोडफोड गरेको छ ।अज्ञात समूहले विद्यालयको अफिस भित्र रहेका शिक्षकका कागजपत्रहरु, कुर्ची, टेवल, दराज लगायतका भौतिक सामाग्रीहरु तोडफोड गरेको विद्यालयका प्रध्यानाध्यापक देबनाथ गिरीले बताउनु भयो ।
प्रअ गिरीका अनुसार बिद्यालयमा रहेका शिक्षकका कागजपत्रहरु र सातहजार पाँचसय नगद समेत लगिएको छ ।
शुक्रबार बिहान १० बजे बिद्यालयको कार्यालय खोल्दा फर्निचर तथा कागजातहरु छरपस्ट अबस्थामा भेटिएको थियो । बिद्यालय तोडफोड भएको पाइए पछि वडा कार्यालय, गाउँपालिका तथा डिमुवा प्रहरी चौकीमा खबर गरिएको थियो ।
तोडफोडको खबर पाएपछि डिमुवा प्रहरी चौकीबाट तत्कालै बिद्यालयमा पुगेको प्रहरी टोलीले घटनाको मुचुल्का गरी अनुसन्धान अगाडि बढाएको छ । उक्त घटनाको कारण र तोडफोड गर्ने समूहको हालसम्म पहिचान हुन नसकेको प्रहरीले बताएको छ ।
घटनाको जानकारी पाए लगत्तै बिद्यालयमा पुग्नु भएका वडाध्यक्ष तिमिल्सिनाले बिद्यालय जस्तो सार्वजनिक स्थलमा भएको तोडफोड निन्दनीय भएको बताउदै दोषीलाई कार्वाही गराउन पहल गरिने बताउनु भयो ।
सो गाउँमा जाँडरक्सी सेवन गरी होहल्ला गर्ने, पटक पटक चोरी, आगलागी तथा तोडफोड गर्ने जस्ता उच्छृङ्खल गतिविधिहरुमा बृद्धि भइरहेको हुँदा भरपर्दो सुरक्षाको व्यवस्था मिलाउन स्थानीयहरुले माग गरेका छन् ।
