पर्वत ।
जिल्लाको मोदी गाउँ पालिकाको केन्द्र पातीचौरलाई वडा न १ भुक, वडा २ देउपुर र वडा न ३ देउरालीसंग जोड्ने पातीचौर लप्सी बोट पक्की सडक अवरुद्ध भएको छ ।
गए रातीको भीषण वर्षा सँगै कोरूँगामा खसेको पहिरोका कारण सो सडक अवरुद्ध भएको हो । उक्त सडक खण्डको ठाउँ ठाउँमा पहिरो गएको कारण सवारी साधनहरु रोकिएका छन् भने यात्रुलाई सास्ती भएको छ ।
सडक निर्माणको बेला देखि नै उक्त क्षेत्रमा पहिरो जान थालेको थियो । अहिले ठूलो बन क्षेत्र पहिरोमा परेको छ भने त्यहाँको बस्ती नै जोखिममा परेको छ ।
कमजोर धरातलमा जथाभावी सडक निर्माण गरिएको कारण पहिरो गएको स्थानियहरु बताउँछन् । सडक नालीमा आउने बाढीको उचित व्यवस्थापन गर्न नसकेको कारण पनि धेरै ठाउँमा पहिरो चलेको छ । लगातार वर्षा भई रहेकोले पहिरो पन्छाएर सडक सुचारु गर्न कठिन भै रहेको छ ।
त्यसैगरी मोदी गाउँ पालिकाको वडा नं ६ को लिदी खोलामा आएको बाढीले अवरुद्ध बनाएको सडक मर्मत पश्चात सुचारु भएको वडाध्यक्ष दिपेन्द्र लामिछानेले जानकारी दिनु भयो ।
