पर्वत ।
भोलि मंसिर २० गतेदेखि मोदी गाउँ पालिकाको वडा नं ६ डिमुवामा सञ्चालन हुने राष्ट्रियसभा अध्यक्ष कप र राष्ट्रपति रनिङ शिल्डको तयारी अन्तिम चरणमा पुगेको आयोजकले जनाएको छ ।
जिल्लाको मोदी गाउँपालिकाको आयोजनामा हुँदै आएको राष्ट्रियसभा अध्यक्ष कपको चौथो संस्करण यही मंसिर २० गतेदेखि २४ गतेसम्म आयोजना हुने भएको हो ।
महिला तथा पुरुष भलिबल, रत्यौली गीत प्रतियोगिता, भजन प्रतियोगितासहित जनप्रतिनिधि, कर्मचारी र शिक्षकहरूबिच मैत्रीपूर्ण भलिबल र म्युजिकल चेयर खेल राखिएको छ । ‘चौथो राष्ट्रियसभा अध्यक्ष कप–२०८०’ ‘खेल अभियान : पालिकाको पहिचान’ नारासहित आयोजना गरिएको हो।
प्रतियोगितामा पुरुष भलिबलतर्फ गाउँपालिकाको वडास्तरीय प्रतिस्पर्धा राखिएको छ। जसमा प्रथम, द्वितीय र तृतीय पुरस्कार क्रमशः १ लाख, ५० हजार र २५ हजार रुपैयाँ नगदसहित शिल्ड, मेडल र प्रमाणपत्र रहेको छ।
महिलातर्फको भलिबल भने खुल्लातर्फ आयोजना गरिएको छ। यसमा देशभरका कुनै पनि महिला समूहले प्रतिस्पर्धा गर्न पाउने छन्। यो प्रतियोगितामा प्रथम, द्वितीय र तृतीय पुरस्कार क्रमशः १ लाख, ५० हजार र २५ हजार रुपैयाँ नगदसहित शिल्ड, मेडल र प्रमाणपत्र प्रदान गरिनेछ।
रत्यौली प्रतियोगितामा मोदी गाउँपालिकाभित्रका समूहले मात्रै भाग लिन पाउने छन्। यसमा प्रथम, द्वितीय र तृतीय पुरस्कार क्रमशः २५ हजार, १५ हजार र १० हजार रुपैयाँ नगदसहित प्रमाणपत्र पाउने छन्।
मोदी गाउँपालिकाका समूहहरू मात्रै सहभागी हुन पाउने भजन प्रतियोगिताका प्रथम, द्वितीय र तृतीय पुरस्कार क्रमशः २५ हजार, १५ हजार र १० हजार रुपैयाँ नगदसहित प्रमाणपत्र पाउने छन्।
भलिबलमा सहभागी हुने समूहले १० हजार रुपैयाँ तथा रत्यौली र भजन प्रतियोगितामा सहभागी हुने समूहले यातायात खर्चवापत १० हजार र ५/५ हजार रुपैयाँ पाउने छन्।
प्रतियोगिता मोदी गाउँपालिका–६ तिलाहारमा रहेको नवजागृत बहुमुखी क्याम्पसको प्राङ्गण र मोदी युवा क्लबको खेल मैदानमा सञ्चालन गरिने र तयारी अन्तिम चरणमा पुगेको कार्यक्रमका संयोजक तथा गाउँपालिकाका उपाध्यक्ष विमल लामिछानेले बताए।
त्यसै गरी राष्ट्रपति रनिङ शिल्ड खेलका लागि गाउँ पालिकाका मावि तथा निमावि तहका विद्यार्थीहरू सहभागी हुँदैछन् । सो प्रतियोगिता अन्तर्गत छात्र छात्रा भलिबल, दौड, रिले दौड, हाइजम्प, लङ जम्प, ट्रिपल जम्प, सटपुट, ज्याभलिन थ्रो, कराते लगायतका खेलहरु सञ्चालन हुने छन् ।
हेर्नुहोस् खेल तालिका
